今個新年,真係整都我痴左線,好似聖誕個陣時咁,乜都好想整呢 >_<

咁日整左個蔗糖年糕,今次個食譜跟肥丁做,要先搓舊面團放一晚,

做出尼既年糕真係好好好軟糯...好似好好味咁...(不過仲未食)..

之前上網睇到有隻乳豬樣既年糕,好想搵依個模..

上網左搵右搵都搵唔到,竟然連淘寶都無..

有次去I   Cake買野,原來佢有喎..正呀..不過一隻豬成六元個,好貴...

買左兩個,要分幾轉蒸..又無咁多時間,唯有蒸4隻..餘下倒入鍚紙盤收工..

係到推介下肥丁個食譜比大家啦 : http://www.beanpanda.com/2012/01/nian_gao_cane_sugar/

越尼越接近過年喇...好忙..好多野未做..連年貨都未辦...

但工依然要返,無計..唯有夜晚返到屋企先做野,

今日整既係椰汁年糕,其實我本身對椰汁味麻麻地,

但因為好想整魚魚形,所以就整下啦....

依個都算整得幾OK呀...係有小小窿仔,唔夠圓滑...

一蒸好老公就話要食...真係比面呢 ^^

今日好早返到屋企,原先話住整年糕,但係煮緊糖個時發現,

有個笨蛋話返屋企個時買椰漿,完全無左件事,仲要煮緊糖先尼記得..

無錯..笨蛋就是我 =_=

咁諗下整乜好啦,有時間無理由唔整野架...於是再戰笑口棗..

其實做法真係好簡單,面粉,泡打粉,梳打粉,糖,鹽,雞蛋,水,全部搓成團,

再分為小粒,沾上芝麻就炸得...睇左書話要溫油慢火喎..

就咁完成!!!

今日約左盈盈一齊玩包油角 & 笑口棗

12點左右開始工作,首先搓好舊麵團,就座底慢慢包..

由開頭第一個完全無從入手,到後來非常熟手,過程真係好好玩,

包完油角3點鐘,食d野再尼整笑口棗,

跟住油開鑊炸,d油角好靚仔咁起鑊,雖然有幾隻爆左口,但影响不大..

到笑口棗,我個懶鬼,一野倒晒落去炸...d笑口棗溶埋晒一齊,變左一大PET野....大失敗..

就係咁..笑口棗死係我手上..浪費埋盈盈一番心機添...Sorry...

好彩油角好好味..叫做有功課交啦..

依排悠悠病左,夜晚好咳,睇左一次醫生都唔得,

星期日仲要鼻水都尼埋,於是又睇多次醫生,

尋日佢無返學,我又請日假陪下佢啦,

個衰豬,我叫佢唔好向住人咳,佢就專登要向住我,我話咁樣媽咪都會病,

佢竟然話 : 媽咪同悠悠一齊病...

就係咁,比佢開口中,到左下午我就開始喉嚨痛,黃昏時間就要落樓睇醫生,

今朝起身,頭又痛,喉嚨又痛,個鼻完全塞晒...唯有請假....

叫老公尼接左悠悠去婆婆到,咁我先有得休息..

訓到十一點幾,起身食D野食藥,想話上下網,上上下又眼訓,又捐返去張床到大覺訓,

訓到四點幾,過去婆婆到食飯,食完返到屋企又係吽吽哣哣咁...十點半又大覺訓了...

估唔到做餅餅,真係可以帶尼一D意外收鑊..

話說尋日同悠悠一齊整左D曲奇餅,今朝早返到學校叫佢送比老師,

佢拎住袋餅餅入課室,見到一個生口面D既老師,佢就比老師,依個時候佢見到佢平時好討厭既胡老師,佢竟然即刻拎去比胡老師,仲話係悠悠同媽咪一齊整...送比老師
就係咁,同老師打開左個話題,我走佢都無喊喇..

跟住我出去窗口裝下佢,見佢好活躍咁做早操呀...見到有個小朋友呆左企係到,佢仲主動走去幫人除書包落尼...好叻女...我個下真係好感動...睇到唔捨得走 >_<

我諗今次真係歸功於依包曲奇餅...令佢對老師多一份親切感啦..

好..感動完,講返個餅..又係叻一份感動..

之前做左幾次印模曲奇,個效果都比較硬身

今次自己改良,係我第一次自己修改食譜,出尼好成功,個餅唔硬,仲有D鬆化,好好味,好開心呢^^

一定要同大家分享下個食譜 :

材料 :
牛油 90g
糖霜 80g
雲呢拿油 數滴
鹽 少許
高筋粉 50g
低筋粉 130g
粟粉 20g
蛋黃 2隻

做法 :
1. 牛油放軟,加糖霜,鹽打至發白,加入雲呢拿油拌勻
2. 分次加入蛋黃,打勻(勿打過度)
3. 篩入粉類,拌勻
4. 印模, 180度焗約20分鐘至金黃即可

今日得閒無乜野做,諗下整D乜野玩下呢,

諗起新年都無有整D野尼慶祝,咁就簡簡單單整個曲奇啦

想玩下花臣,整兩舊麵團,一舊牛油味,一舊加入朱古力粉,

左印印右砌砌咁,整左D曲奇出尼,空位上印D字上去先,

一粒一粒咁印上去,真係粒粒皆辛苦呀...但出尼幾靚呢 ^^

星期日bbq時,淨左半袋甜方包,用尼整左個簡單容易既麵包布甸,

材料 : 方包3片, 雞蛋一隻,牛奶190g, 雲呢拿油及玉桂粉少許,糖 25g

做法 :
1. 方包切除邊皮,切粒
2. 其他材料全部拌勻,倒入方包內,浸一陣
3. 可加入提子乾 (我加左雜果皮,太甜,要減糖)
4. 180度,焗20分鐘左右至金黃色

係唔係超級簡單呢,但好好味架..熱辣辣食真係暖入心呢 ^^

過完聖誕,過埋元旦假期,今日要好好休息,收拾心情返工返學了..

尋晚悠悠好咳,又好似鼻塞塞咁,前一日又可能玩得太開心,夜晚扭左三次計,攰死我了..

一早起身帶佢去睇醫生,同姨媽食個午餐,個午餐係去左富田食日本野,

叫左兩個套餐,個餃子同前菜追極都唔尼,追左四次,竟然尼一份..頂..唔鬼食喇,走人

返到屋企,餵完悠悠食藥訓覺,就開始整定晚飯既野..

整左個粟米雞肉薯蓉批,幾好味呢..不過批底用左之前蘋果批個食譜,比較甜,同D配料唔係好夾..哈哈.但都幾好味啦..

各位新年快樂呀!!!!!!!!!!!!!!!!!!

新一年願望,都係新體健康.....不過今日我又病左啦..有D傷風..

今朝一早起身,同親戚家人去接住係老人既亞公出尼飲茶,唔知係唔係太開心,亞公竟然喊了,
一個人老左,要人照顧,住係老人院,行動唔方便,連食野都要人餵,真係好可憐,我諗我都係唔好咁長命好了...

飲完茶,送左亞公返老人院,家人同表妹&表妹男友,去我屋企BBQ,同媽咪慶祝生日

祝媽咪生日快樂,身體健康呢...

我當然又要自家制蛋糕啦,依個係為媽咪而整既檸檬芝士蛋糕,酸酸地,個面仲有其他水果,健康D呢